无标题文档

来论丨逃犯罗冠聪获颁博士学位,Is this a joke?

2022-05-25 14:31

稀思路/笔是机场

如何分辨一个人到底系爱国爱港人士,定系一个反中乱港嘅破坏分子?有啲人觉得要睇佢嘅言行,有啲人觉得要睇佢嘅所属组织;其实,仲有一个显而易见而且一定唔会有错嘅分辨方法,就系睇呢个人有冇得到外部势力嘅“奖赏”!最近,前香港众志主席、揽炒派政客罗冠聪获得获美国东岸宾夕法尼亚州私立博雅大学Washington & Jefferson College颁授荣誉博士学位,以“表扬”佢喺争取人权、民主同自由上嘅“贡献”;对于罗冠聪获美国嘅大学颁授荣誉博士学位,大家首先可能会质疑“佢凭什么”,而笔者就谂到,佢得到外部势力“嘉许”,全因佢“用心”破坏香港。

根据报道,罗冠聪之所以获颁荣誉博士学位,系因为佢争取“人权、民主同自由”,呢个讲法真系“假到喊”,事实在于,佢根本就唔系争取咩民主同自由,而系同其他揽炒派一样,破坏紧香港嘅民主同自由先啱,严格而言,佢系一个通缉犯!

睇返公开资料,早喺2020年7月底,即系香港国安法实施咗大约一个月嘅时间,警方就以涉嫌违反香港国安法,通缉六名“流亡”海外嘅香港人,其中就包括罗冠聪,当时警方嘅消息,系指六人涉嫌煽动分裂国家及勾结外国或者境外势力危害国家安全,一旦回港将被拘捕。到去年12月,本港嘅廉政公署就通缉罗冠聪等人,指佢哋涉嫌违反《选举(舞弊及非法行为)条例》当中煽动人“投白票”嘅罪行。即系话,单单系罗冠聪一个揽炒派政客,就已经涉及至少两罪而被香港执法部门通缉。

一个“走佬”外国嘅香港通缉犯,得到外部势力嘅大学颁受荣誉学位,咁似乎系表示外部势力系喺度“嘉奖”紧破坏香港嘅人;嚟个逆向思维,如果香港特区以至内地去嘉许喺美西国家涉嫌违法、仲要系涉及国家安全法律嘅人,唔知美西国家又会有咩想法呢?呢件事并唔系表面睇“罗冠聪获颁荣誉学位”咁简单,而系外部势力又借机干预中国嘅内部事务!

对于自己获颁荣誉学位,罗冠聪提到自己喺香港嘅母校,仲指母校已“礼崩乐坏”,笔者真心觉得,罗冠聪“面皮厚”;讲到礼崩乐坏,香港嘅制度、治安以至法治,喺黑暴运动同非法“占中”前,一直都非常良好,就系因为有罗冠聪呢类揽炒政客,令到香港法治以至治安都受到冲击,真正想香港礼崩乐坏嘅人,根本就系一班揽炒派政客先啱!依家佢仲好意思借香港嚟抽“政治水”?如果佢有承担,唔该就返嚟香港自首。

其实讲开罗冠聪,笔者仲有一个一直都解开唔到嘅“谜团”,就系罗冠聪去咗外国咁耐,到底系靠咩“维生”呢?罗冠聪既然咁钟意高调喊话,不如公开话畀大家听佢嘅收入来源系源自边度?佢系咪得到外部势力嘅关照甚至“助养”?如果一个通缉犯得到外部势力嘅“大力支持”,咁香港市民闹呢啲人系汉奸,真系讲得一啲都冇错!

来源:文汇报