从来冇买美股习惯，因觉得麻鬼烦，又要先兑美元，又唔知要抽几多税及手续费。所以，虽然几年前分析及介绍过Lululemon，当时200美元出头，一度爆升至400几美元，不过，我冇乜动心，只暗暗觉得自己有眼光，正！

Lulu一日插水近两成

留意Lulu，因衣柜内有甚多“柠檬”，一着就唔会换牌子，肯定佢市场潜质极大。上周一，在毫无心理准备吓睇股价，哗，搞乜鬼，“柠檬”一日内插水近两成？

发生乜事？喂！刚刚公布第一季业绩好理想喎，点解呢？分析师解画指，因担心美国关税将令公司盈利大减，故被狂沽。

呢只股，似足过山车，大上大落，波幅又密又大，捉正浪底的话，过去5年已可走多转，大家上网睇睇5年走势图已知。尤其近1年，更夸张，好似癫癫哋。

举例，此股去年8月5日跌至226美元 ，跟住似坐火箭，短短5个月铲上423美元 ，升9成，何其夸张！一上到高位，又掉头落，今年4月8日，再挞落239美元 ，然后再立即反弹，6月3日见340美元。咁频密玩高高低低，当然不是散户，而是大大大户睇中此股特性，舞高弄低。

关税借口如明日黄花

从过往的手法，好可能今次一日锄两成，又系玩先质低再弹高。每次质低，当然要搵个似层层的借口，今次正是美国狂人总统乱加关税。

喂，呢单野，好似有少少明日黄花喎。人人都在唱狂特TACO（Trump Always Chickens Out)，你睇佢点同中国deal就知，其实佢系二仔底，冇乜料到，别人一硬佢就缩。所以炒友用关税来做低Lululemon，除非只股真系有质变，又或市场大转弯啫，睇来睇去唔系喎，兼且，第一季数字又好靓仔。

既然过去三年错失咁多玩波浪机会，今次等我处男下海，试吓买佢啦。上周入货价位是255美元，若跌，于220美元再double加码。升又如何？到300美元后就每升20美元沽五分一。

且看今次处男食“柠檬”，食出个乜野结果。

资深传媒人 曾智华