▲西班牙传控足球瞬间变得“有姿势，无实际”。Reuters

西班牙再次喺互射12码阶段落败，连续两届世界杯16强出局。先唔讲连续3球12码射失嘅问题，球队全场传球次数达1050次，最后一球都入唔到。前线艾华路莫拉达（Álvaro Morata）、费伦托利斯（Ferran Torres）毫无建树，中场加维（Gavi）、柏迪（Pedri）喺进攻上帮唔到手。部分位置嘅能力不足，令呢种传控足球瞬间变得“有姿势，无实际”。即使炒咗安历基（Luis Enrique），换入第二位教练，都系无补于事。

至于击败西班牙嘅摩洛哥，门将耶辛尼保奴连救两球十二码嘅神勇表现固然值得一赞，但艾尔更欣赏球队嘅铁血防守。小弟有拜读加利李尔嘅文章，深知摩洛哥部分球员非常有个人特色，但睇完过去四场只失一球乌龙球，再睇埋上场后卫沙斯踢到有伤，仍继续顶硬上嘅表现，足以证明后防球员嘅防守纪律同集中力非常强。

摩洛哥呢几场比赛喺中路嘅防守非常严密，除咗两个中坚之外，三人中场不时会落番禁区补位。面对呢种铁桶式防守，克罗地亚、比利时同西班牙呢啲欧洲中上级别球队都入唔到波，防守非常硬净。呢支北非球队喺反击亦非常有威胁，上场对西班牙下半场连埋加时只系起脚三次，都有两次中目标，唔系后备入替嘅华列查迪拉一次又一次错失单刀机会，摩洛哥未必要踢到互射十二码阶段。

防守纪律强，反击具侵略，球队更不时以死球入波。老实讲，摩洛哥球员唔系个个顶级超卓，可以喺咁短时间有咁大改变，尽力喺有限资源下踢出最大效益，领队列格古有非常大嘅功劳。嚟紧面对葡萄牙，艾尔相信会系一场非常精采嘅攻防战！　

艾尔

以上内容归星岛新闻集团所有，未经许可不得擅自转载引用。